हुम्ला — रेडियो श्रीनगर एफएमका समाचार संयोजक मोहनसिंह बुढाले आफ्नो प्रारम्भिक शिक्षा हासिल गरेको विद्यालयलाई सहयोग प्रदान गर्नुभएको छ।
हुम्लाको अदानचुली गाउँपालिका वडा नम्बर २ स्थित पुद्दुकोट आधारभूत विद्यालयलाई बुढाले १० वटा कुसन सहयोग गर्नुभएको हो। बुढाले मंगलबार विद्यालयमा गएर साे सामाग्री हस्तान्तरण गरेकाे हस्तान्तरण गर्नुभएकाे प्धानाध्यापक लग बहादुर बुढाले बताउनु भएकाे छ ।
उक्त सहयोगले विद्यालयमा अध्ययनरत बालबालिकाहरूलाई बस्न सहज वातावरण सिर्जना हुने अपेक्षा गरिएको छ। सञ्चारकर्मी तथा गोरखापत्रकर्मी समेत रहनुभएका बुढाले यही विद्यालयबाट आफ्नो शैक्षिक यात्रा सुरु गर्नुभएको थियो, जहाँ उहाँले कक्षा २ सम्म अध्ययन गर्नुभएको थियो।
आफ्नो बाल्यकालका ती सम्झनालाई मनन गर्दै उहाँले विद्यालयप्रतिको माया र जिम्मेवारीबोधका कारण सहयोग गरेको बताउनुभयो। उहाँले भन्नुभयो, “गाउँका विद्यालयहरू नै भविष्यका सक्षम नागरिक उत्पादन गर्ने आधार हुन्। सानो सहयोगले पनि विद्यार्थीहरूको सिकाइमा ठूलो प्रभाव पार्न सक्छ।
हामी सबैले आफ्नो क्षमताअनुसार शिक्षामा योगदान गर्न जरुरी छ।” हुम्ला जस्तो दुर्गम जिल्लामा अझै पनि शैक्षिक पूर्वाधार, शैक्षिक सामग्री तथा स्रोतसाधनको अभाव रहेको छ। विद्यार्थीहरू सामान्य आधारभूत सुविधाबाट समेत वञ्चित हुने अवस्था देखिन्छ।
यस्ता अवस्थामा स्थानीय स्तरबाट हुने सानो–सानो सहयोगले विद्यालयको शैक्षिक वातावरण सुधार्न महत्वपूर्ण भूमिका खेल्ने विश्वास गरिएको छ। विद्यालय व्यवस्थापन समितिका प्रतिनिधिहरूले बुढाको सहयोगप्रति आभार व्यक्त गर्दै यसले विद्यार्थीहरूलाई थप हौसला मिल्ने बताएका छन्।
“विद्यार्थीहरू सहज रूपमा बस्न पाउने भएपछि उनीहरूको ध्यान पढाइतर्फ केन्द्रित हुनेछ,” विद्यालय पक्षको भनाइ छ। यसैबीच, शिक्षाको गुणस्तर अभिवृद्धि गर्न केवल सरकार मात्र होइन, स्थानीय समुदाय, पूर्व विद्यार्थी तथा सरोकारवालाहरूको पनि सक्रिय भूमिका आवश्यक रहेको सरोकारवालाहरूले बताएका छन्।
यस्ता सहयोगले विद्यार्थीहरूमा सकारात्मक सोच विकास हुनुका साथै आफ्नो गाउँप्रति जिम्मेवार बन्ने प्रेरणा पनि मिल्ने अपेक्षा गरिएको छ। मोहनसिंह बुढाको यो पहलले अन्य व्यक्तिहरूलाई पनि शिक्षाको क्षेत्रमा सहयोग गर्न उत्प्रेरित गर्ने विश्वास गरिएको छ।