हुम्लाको लामा साँकृति मञ्चमा सञ्चालन भएको आठौँ बज्रगुरु ढुङ्गढुप पूजामा पाँच दिनको अवधिमा पाँच करोडभन्दा बढी बज्रगुरु मन्त्र जप गरिएको छ । लामा सांस्कृतिक मञ्चको आयोजनामा सम्पन्न पूजामा ८० जना लामा र एक हजार पाँच सयभन्दा बढी स्थानीय नागरिकको सहभागिता रहेको लामा साँकृति मञ्च हुम्लाका अध्यक्ष छेपा दोर्जे लामाले बताउनु भयो ।
बौद्ध धर्मावलम्बीहरूको महान् धार्मिक पर्वका रूपमा लिइने बज्रगुरु ढुङ्गढुप पूजा पाँच दिनसम्म सञ्चालन भएको हो । पूजामा सहभागी महिला तथा पुरुष भक्तजनहरूले पाँच दिनको अवधिमा कुल ५ करोड २३ लाख ३ हजार १०० पटक बज्रगुरु मन्त्र जप गरेका छन् । ढुङ्ढुपको अर्थ १० करोड भन्त्र भनिएता पनि यतिबेलाको पुजामा ५ करोड भन्दा धेरै मन्त्र जप गरिएको बताउनु भयो ।
उहाँका अनुसार पूजाका क्रममा एक दिनमा सबैभन्दा बढी १ करोड ३९ लाख ७७ हजार ८०० र सबैभन्दा कम ८१ लाख ४३ हजार मन्त्र जप गरिएको थियो । सहभागी प्रत्येक भक्तजनले रुद्राक्षको माला हातमा लिएर बिहान पूजा सुरु भएदेखि साँझ सम्पन्न नहुँदासम्म मन्त्र जप गर्दै गन्ने गरेका थिए । यसरी सामूहिक रूपमा मन्त्र जप गर्दा सारा जगत र समग्र समाजको कल्याण हुने धार्मिक विश्वास रहेको छ ।
हरेक वर्ष आयोजना हुँदै आएको यस आठौँ पूजा हुम्लाको दोजम गाउँका लामा समुदायले प्रायोजन गरेका छन् । पूजाका लागि प्रायोजक नपाएको अवस्थामा समेत लामा सांस्कृतिक मञ्चको कोषमा जम्मा भएको रकम खर्च गरेर भए पनि निरन्तरता दिइरहेको मञ्चका अध्यक्ष लामाले बताउनुभयो ।
उहाँका अनुसार अर्को वर्ष आयोजना हुने पूजाका लागि यस यस पुजामा स्वेच्छिक सहयोग सङ्कलन गरिएकोमा करिब ९ लाख रुपैयाँ जम्मा भएको छ । उक्त रकम आगामी वर्षको पूजा सञ्चालनका लागि राखिने बताउनु भयो ।
पूजाका अवसरमा एक हजार दियोमा बत्ती बाल्नुका साथै हुम्लाको प्रशिद्ध याल्वाङ गुम्बाका लामा पेमा रिक्साल रिम्पोछेले अमृतमय धार्मिक प्रवचन दिनुभएको थियो । पूजामा सिमकोट र नाम्खा गाउँपालिकाका २५ भन्दा बढी बस्तीका बौद्ध धर्मावलम्बीहरूको सहभागिता रहेको बताउनु भयो । –––कालीबहादुर थापा
