हुम्लाको अदानचुली गाउँपालिका–४ मछारीमा राति माथिबाट खसेको ढुंगा घरको छतमा बज्रिँदा जेसीभी चालकसहित तीन जना घाइते भएका छन् । घटनामा दैलेखको दुल्लु घर भएका जेसीभी चालक बखत खड्का गम्भीर घाइते भएका छन् ।
आज राति करिब ३ बजेको समयमा रिल्म हुँदै विगाठीसम्मको सडक निर्माणका लागि काम गरिरहेका उनीहरू मछारी पुलपारिको एक घरमा सुतेका थिए । अचानक माथिबाट खसेको ठूलो ढुंगा घरको छतमा खसेपछि घरभित्र सुतेका खड्कासहित रुकुम पश्चिमका रोसन राना र हुम्ला सिमकोटका रमेश शाही घाइते भएका हुन् ।
घाइतेमध्ये राना र शाहीको अवस्था सामान्य रहेको छ भने जेसीभी चालक खड्काको टाउकोमा गम्भीर चोट लागेको अदानचुली ४ लौठी घर भएका स्थानीय दिनेश पाण्डेले बताउनुभयो ।
घटना भएको जानकारी पाएलगत्तै लौठी गाउँबाट स्थानीय घटनास्थलमा पुगेका थिए । उनीहरूले घाइतेलाई स्टेचरमा राखेर तत्कालै श्रीनगर स्वास्थ्य चौकी र्पुयाएका थिए । अहिले तीनै जनाको श्रीनगर स्वास्थ्य चौकीमा प्राथामिक उपचार भइरहेको भएपनि चालक खड्काको अवस्था निकै गम्भिर देखिएकाले अहिले तिनैजनालाइ हेलीकप्टर मार्फत सुर्खेत लगिएको अदानचुली गाउँपालिकाका उपाध्यक्ष कर्ण रोकायाले बताउनु भयो । श्रीनगर स्वास्थ्य चौकीले यहाँ उपचार गर्न सम्भव नभएको भन्दै रिफर गरेपछि ठेकदार कम्पनीलाई जानकारी गराई उनिहरुकै पहलमा हेलीकप्टर मार्फत थप उपचारको लागि लिन लागिएको बताउनु भयो । उक्त सडक निर्माणको ठेक्का हुम्लाकै कङ्ग्री निर्माण सेवाका छिरिङ लामाको रहेको छ ।
सडक निर्माणका क्रममा कामदारहरू बसेको घरमै माथिबाट ढुंगा खसेपछि रातको समयमा भएको घटनाले स्थानीयमा त्राससमेत बढाएको छ । –––कालीबहादुर थापा