हुम्लाको उत्तरी सीमा नाका हिल्सामा अविरल वर्षासँगै भएको भारी हिमपातका कारण ४१ जना नेपाली नागरिक अलपत्र परेका छन् । गत शुक्रबारदेखि निरन्तर परेको वर्षा र हिमपातका कारण हिल्सा–ताक्लाकोट आवतजावत प्रभावित भएपछि उनीहरू हिल्सामै रोकिएको हिल्सामा कार्यरत अध्यागमन अधिकृत विमल पौडेलले बताउनु भयो ।
उहाँका अनुसार अलपत्र पर्नेहरू नाम्खा गाउँपालिका–१, २ र ३ का नागरिक हुन् । उनीहरूमध्ये अधिकांश ताक्लाकोटमा व्यापार व्यवसाय गर्दै आएका छन् । घरबाट ताक्लाकोट फर्किने क्रममा शुक्रबार हिल्सा पुगेका उनीहरू सोही रात हिमपात सुरु भएपछि हिल्सामै रोकिएका बताउनु भयो ।
अधिकृत पौडेलका अनुसार उनीहरूमध्ये अधिकांस कैलाश मानसरोवर दर्शनका लागि आएका पर्यटक नभई ताक्लाकोटमा व्यापार व्यवसाय गर्दै आएका नेपाली नागरिक हुन् । हिमपातका कारण सीमा क्षेत्रमा आवतजावत रोकिएपछि उनीहरू हिल्सामै बस्न बाध्य भएका हुन् ।
यता, हिमपातका कारण कैलाश मानसरोवर दर्शनका लागि चिनियाँ पक्षले समेत आवतजावत बन्द गरेको छ । हिल्सामा कार्यरत अध्यागमन कर्मचारी पेमा लामाका अनुसार अक्टोबर ४ अर्थात असोज १८ गतेदेखि नाका खुल्ने चर्चा भए पनि मौसमको अवस्था हेर्दा यस वर्षका लागि नै यात्रा बन्द हुनसक्ने अवस्था देखिएको बताउनु भयो । उहाँका अनुसार यस्तो चिसोमा कोरा लगायन समेत नसकिने भएको छ सायद यस वर्षको लागि खुल्न नसक्ने बताउनु भयो ।
ताक्लाकोट प्रवेशका लागि हिल्सा पुगेका नेपालीहरू चिनियाँ पक्षको सुरक्षा प्रणालीमा समस्या आएको र अत्यधिक चिसो तथा हिमपातका कारण आवतजावत रोकिएपछि हिल्सामै रोकिएका हुन् । हिमपातका कारण हिल्सामा खानेपानी र बत्तीकोे समस्या भएको बताउनु भयो ।
हिल्सा पुग्ने बाटो खुलाउन चुनौती
चीनतर्फको सडक खुलाउने काम भइरहेको भए पनि नेपालतर्फ हिल्सा पुग्ने सडक खुलाउन भने अझै समय लाग्ने देखिएको छ । सशस्त्र प्रहरीका नायब उपरीक्षक नन्दबहादुर शाउदका अनुसार हिल्सामा करिब दुईदेखि अढाइ फिटसम्म हिउँ जमेको छ ।
हिल्सा पुग्न करिब ४ हजार ६ सय मिटरभन्दा बढी उचाइमा रहेको नारा लेख पार गर्नुपर्ने भएकाले त्यहाँ जमेको हिउँ पन्छाउन थप समय लाग्ने उहाँले बताउनुभयो । हिल्सामा एउटा मात्रै स्काभेटर रहेकाले सडक खुलाउने काममा कठिनाइ भएको र इन्धनको समेत समस्या रहेको उहाँको भनाइ छ । यद्यपि स्थानीयवासी र सुरक्षाकर्मीले हिउँ पन्छाएर सडक सञ्चालनमा ल्याउने प्रयास भने निरन्तर गरिरहेको बताउनु भयो ।
६ हजार १० जनाले गरे कैलाश मानसरोवर दर्शन
यस वर्ष हालसम्म हिल्सा नाका हुँदै ६ हजार १० जना पर्यटकले कैलाश मानसरोवर दर्शन गरेका छन् । अध्यागमन अधिकृत विमल पौडेलका अनुसार कैलाश मानसरोवर जाने पर्यटकमध्ये सबैभन्दा ठूलो संख्या भारतीय नागरिकको रहेको छ । त्यसपछि बेलायत, अमेरिका र नेपाली नागरिक लगायत पर्यटक रहेका छन् ।
यसअघि पनि एक समूह हिमपातका कारण हिल्सा नाकाबाटै कैलाश मानसरवर दर्शनको लागि गएको तर उक्त टोलीलाई हिमपातका कारण यस नाकाबाट फर्किन असम्भाव भएपछि उक्त समूह ल्हासा हुँदै फर्किसकेको बताउनु भयो ।
यस वर्ष कैलाश मानसरोवर दर्शनको मुख्य सिजन सकिनै लाग्दा भएको भारी हिमपातले हिल्सा नाकामा आवतजावतसँगै स्थानीय व्यापार र सीमा क्षेत्रको जनजीवनसमेत प्रभावित भएको छ । –––कालीबहादुर थापा